Навіны - Цалкам



CПЫНІЦЬ ПРАВАКАЦЫЙНЫЯ МАРШЫ

posted by Адміністратар Навін   [ updated ]

    23-24 траўня ў Кракаве (Польшча) адбылася міжнародная канфэрэнцыя "За нашу і вашу свабоду", арганізаваная польскім Інстытутам Нацыянальнай памяці пры ўдзеле былых дзеячоў Усходняга аддзелу "Змагарнай салідарнасьці". Прысутнічалі, выступалі з дакладамі і прамовамі прадстаўнікі дэсідэнцкіх рухаў з Польшчы і былых акупаваных краінаў СССР: Азэрбайджана, Арменіі, Грузіі, Крымска-татарскай аўтаноміі, Украіны, Чачэніі, Беларусі.

    У канфэрэнцыі ўдзельнічалі кіраўнікі Кансэрватыўна-Хрысьціянскай Партыі БНФ. Былі прынятыя рэзалюцыі ў падтрымку свабоды і змагароў крымска-татарскага народа і законнага прадстаўніцтва Рэспублікі Ічкерыя.

    Канфэрэнцыя прыняла таксама зварот да ўладаў і патрыётаў Польшчы спыніць правакацыйныя маршы польскіх шавіністаў на Беласточчыну ў падтрымку спраўцаў генацыду беларусаў Беласточчыны ўзброенай групай Райса (Бурага) зімой 1946 года.

    Выніковы тэкст звароту ніжэй зьмяшчаем поўнасьцю:

                                                                   Зварот

                       да ўсх польскіх патрыётаў і мясцовых уладаў у справе маршу

                           памяці «выклятых жаўнераў» і дзейнасьці Райса (Бурага)

    Зьвяртаемся да польскіх мясцовых уладаў і да польскіх патрыётаў, каб сёньня асобы (у шчырасьці намераў і патрыятызме якіх мы не сумняваемся), баронячы памяць пра «выклятых жаўнераў», ўзгаднялі гэта з правам, з агульным інтарэсам і справядлівым падыходам, не дазвалялі, не праводзілі і ня ўдзельнічалі ў так званых маршах «Бурага», кіруючыся дзяржаўнымі інтарэсамі цяперашняй Польшчы, якія сёньня грунтуюцца на абніжэньні ўзроўню нэгатыўных эмоцый паміж польскім і беларускім народамі, на разьвіцьці супрацоўніцтва, заснаванага на даверы і ўзаемна карыснай мірнай працы.

                                                                       Apel

                    do wszystkich polskich patriotów i władz miejscowych w sprawie marszu

                            ku pamięci „zołniezy wyklętych” i działalności Rajsa (Burego).

    Apelujemy, do polskich władz miejscowych i do patriotów polskich aby dziś osoby, w których szczere intencję i patriotyzm nie wątpimy, broniąc pamięci Żołnierzy Wyklętych, uwzględniały to z prawem, ze wspólnym interesem i sprawiedliwym podejściem, nie dawali zezwolenia, nie prowadzili i nie uczęstniczyły w tzw. marszach “Burego” kierując się racją stanu współczesnej Polski, która dziś polega na obniżeniu poziomu negatywnych emocji między narodami polskim i białoruskim, rozwijaniu współpracy opartej na zaufaniu i wzajemnie korzystnej pokojowej współpracy.

    Такія канфэрэнцыі праводзяцца ў Польшчы пэрыядычна ў Варшаве ды Кракаве, спрыяюць абмену думкамі, высьвятленьню пазыцый, пацьвярджаюць агульныя дэмакратычныя інтарэсы.

25 траўня 2018 г.                                                                                                     Адам Мікша

Да 30-ых угодкаў адкрыцьця Курапатаў

posted May 21, 2018, 12:11 PM by Адміністратар Навін   [ updated May 21, 2018, 12:12 PM ]

У чэрвені сёлета спаўняецца 30 гадоў адкрыцьця Курапатаў, месца самых масавых растрэлаў людзей у Беларусі сталінскім маскоўскім камуністычным рэжымам ў 1937-1941 гадах. Пачынаючы з 1988 году ў Курапатах беларускае грамадзтва стварыла Народны Крыжовы Мэмарыял, які ўвесь час ўладкоўваецца і развіваецца. Мэмарыял “Курапаты” мае статус помніка 1-й катэгорыі.

Кансэрватыўна Хрысьціянская Партыя – БНФ падала заяву на правядзенье мітынга-рэквіема “Дзень памяці пра генацыд”. Заява пададзена ў Мінскі абласны выканаўчы камітэт.

Плануецца выстава фотаматэрыялаў і дакумантаў на пераносных стэндах, выступленьні, мэмарыяльная музыка.


Інфармацыйная камісія Кансэрватыўна-Хрысьціянскай Партыі – БНФ

15.05.2018 г.

Супраціў Маскве. Салідарнасьць у абароне беларускай мовы і культуры

posted May 14, 2018, 5:48 AM by Адміністратар Навін   [ updated May 14, 2018, 5:48 AM ]

(Травеньскі Сойм 2018 г. Кансэрватыўна-Хрысьціянскай Партыі – БНФ і Беларускага Народнага Фронту “Адраджэньне”)

13 траўня ў Менску адбыўся чарговы Сойм КХП-БНФ і БНФ “Адраджэньне”. Сойм заслухаў выступ сп. Зянона Пазьняка, Старшыні Кансэрватыўна-Хрысьціянскай Партыі – БНФ і Беларускага Народнага Фронту “Адраджэньне”. Старшыня засяродзіў увагу на аналізе становішча і высновах для дзеяньняў, адзначыў важнасьць падрыхтоўкі пасьлядоўнікаў Адраджэньня, прапанаваў рыхтавацца да правядзеньня «Дзён Памяці пра генацыд» з нагоды гадавіны адкрыцьця Курапатаў.

З дакладам выступіў сп. Сяргей Папкоў, нам. старшыні Партыі і Фронту. Выступоўца паведаміў пра ўзмацненьне дзейнасьці рэжыму па ліквідацыі беларускай культуры і мовы. Аналіз статыстыкі, тэндэнцый і фактаў паказвае, што, выконваючы загад Масквы і пад яе кіраўніцтвам, мясцовы рэжым разбурае беларускую адукацыю, грунтуючы яе на чужой сурагатнай расейскай аснове і адукацыйнай мадэлі. Масква ўжо давяла да мізэрнага, ганебнага стану адукацыю ў Расеі, цяпер імпэрыя імкнецца давесьці сваю разбуральную працу да канца і ў нашай краіне. На ўсіх узроўнях рэжымныя прапагандысты даказваюць, што якасьць інтэлектуальнага разьвіцьця “не залежыць ад мовы”. Усё робіцца для таго, каб працэс русіфікацыі беларускай моладзі і грамадзтва ў цэлым быў завершаны імпэрскай перамогай. Беларусы, беларускія сем’і павінны аказваць супраціў акупанцкаму разбурэньню нацыі, не аддаваць дзяцей на русіфікатарскую пераробку і ажлабленьне. Мы павінны мабілізаваць грамадзтва на салідарную абарону роднай мовы і культуры.

Выступілі таксама сябры Сойму з розных рэгіёнаў краіны. Яны паведамілі пра інтэнсіфікацыю дзеяньняў расейскай ваеншчыны на тэрыторыі Беларусі. У інфармпрасторы зьяўляюцца таксама паведамленьні і выступы расейскіх дзяржчыноўнікаў на тэму стварэньня новых армій, вайсковых фармаваньняў і канцэнтрацыю іх у заходніх рэгіёнах Расеі.

Зьвяртае на сябе таксама ўвагу актыўная і агрэсіўная прапаганда “русского міра” і расейскага мілітарызма ў Расеі, Беларусі і іншых краінах сьвету. Гэтыя факты сьведчаць аб тым, што Масква рыхтуецца да вялікай вайны. Ня выключана, што ў якасьці плацдарма будзе выкарыстана наша тэрыторыя. Беларусь, такім чынам, апынецца закладніцай чужой вайны, наш народ будзе трактавацца ў сьвеце як народ-агрэсар, які дзейнічае разам з імпэрыяй-агрэсарам.

З другога боку, вельмі многія ставяцца да апошніх дазволаў рэжыму на патрыятычныя маніфэстацыі (асабліва на сёлетні Дзень Волі ў Менску) і на выкарыстаньне нацыянальнай сымволікі як да праявы пэўнай лібэралізацыі рэжыму, яго самастойнасьці. Вельмі важна, каб беларусы выкарыстоўвалі гэтыя магчымасьці, але не жылі ў ілюзіях. Бачна, што Масква дала загад на часовыя талерантныя адносіны да праяваў беларускай палітычнай культуры. Крэмль зацікаўлены ў захаваньні сацыяльнага спакою і стабільнасьці ў Беларусі, тэрыторыю якой выкарыстоўвае ў якасьці ваеннага плацдарма. Таксама Масква хоча прамацаць глебу ў Беларусі на прадмет магчымага супраціву агрэсіі, даведацца пра настроі грамадзтва.

Раптоўная адмова ад правядзеньня рэжымнага рэфэрэндуму пасьля перамогі народных пратэстаў у Арменіі пацьвярджае гэтыя меркаваньні. Масква збаялася, што беларускае грамадзтва будзе пратэставаць супраць імпэрскага “рэфэрэндума”. У наяўнасьці гібрыдныя дзеяньні імпэрскага ворага. Нельга некрытычна ўспрымаць тое, што робіцца Масквой у Беларусі і сьвеце. Трэба адсочваць падзеі, зьявы, тэндэнцыі, супастаўляць іх і імкнуцца зразумець, што адбудзецца ў іх выніку, якую карысьць атрымае з гэтага Масква і якая шкода будзе нанесена Беларусі.

Сойм таксама разгледзеў планы партыйнай дзейнасьці на бліжэйшы пэрыяд.

Інфармацыйная камісія Кансэрватыўна-Хрысьціянскай Партыі – БНФ і Беларускага Народнага Фронту “Адраджэньне”

13 траўня 2018 г.



РАЗУМНАЯ ПАДРЫХТОЎКА І ЗЬБЕРАЖЭНЬНЕ СІЛ

posted May 14, 2018, 5:40 AM by Адміністратар Навін   [ updated May 14, 2018, 5:40 AM ]

(Урыўкі з выступу на травеньскім 2018 г. Сойме КХП-БНФ і БНФ “Адраджэньне”)

... Чакайма вясны сапраўднай, дакладней – набліжайма яе, бо чаканьнем нічога ня зробіцца. І хаця дрэннага шмат, не апускайма рук, не паддаваймася пачуцьцям. Спакойна, цагліна за цаглінай рабем справу, бо ўсялякая справа патрабуе падрыхтоўкі і зьберажэньня сіл.

Назіраючы за нашым грамадзтвам і спатыкаючы тут (за мяжой) яго прадстаўнікоў, можа скласьціся ўяўленьне, што мы набліжаемся да катастрофы. Але гісторыя ўвесь час даказвае, што гэта заўсёды перабольшанае і памылковае ўяўленьне, якое ўзьнікае напярэдадні перамен, калі стагнацыя пачынае ўплываць на большасьць людзей.

У такі пэрыяд важна абараніць галоўныя нацыянальныя каштоўнасьці і вызначыць (паўтараць) галоўныя ідэі пераменаў. Мы – адзіная беларуская нацыянальная адраджэнская партыя ў краіне і на нас кладзецца такая адказнасьць. Акрамя нас, рэальна, тым ня будзе ніхто займацца. Гэта ўсім зразумела даўно. Наша задача цяпер знаходзіць пасьлядоўнікаў. Мы ня маем сродкаў і магчымасьці ўплыву на масы. Але людзі дасьведчаныя ў палітыцы ведаюць, што дзясятак пасьлядоўнікаў важнейшы за дзясяткі тасячаў згоднай, але інэртнай масы.

Нам трэба разумна адзначыць 30-годдзе адкрыцьця Курапатаў... правесьці “Дзень памяці пра генацыд”...

...Пасьля гэтага мерапрыемства на працягу чэрвеня-ліпеня трэба будзе... праэкспанаваць... працу... ў іншых месцах... Напрыклад, у Лесе Ваньковіча (савецкі парк “чалюскінцаў”) і на пляцоўцы паміж Акадэміяй Нвук і 1-м клінічным шпіталём, дзе ў 1919-1920-х гадах расейскія бальшавікі праводзілі масавыя расстрэлы людзей, якіх хапалі і забівалі проста на вуліцах.... Завершыць гэтыя Дні Памяці пра генацыд трэба Ігуменскім шляхам, на які запрасіць паболей людзей....

...Ацэньваючы агульнае становішча, я зноў зьвяртаю ўвагу на тое, што ўсе антыбеларускія захады, якія адбываюцца ў краіне, -- маюць сістэмны характар і падпарадкаваны стратэгічна задачы пуцінскай Масквы – падрыхтоўцы акупацыі і сілавога захопу Беларусі. Прэпарацыя беларускага грамадзтва, якую праводзіць рэжым (нестандартны перапіс насельніцтва, абсурдальная ўпартасьць ў прыняцьці так званых дэкрэтаў аб непрацуючых №1 і 3, блакіроўка інтэрнэт-рэсурсаў і забараняльныя акты аб СМІ, да гэтага ж пабудова Астравецкай АЭС, расейскія вайсковыя вучэньні ў Беларусі, пропуск расейскай агентуры ў псэўдавыбары і ўключэньне яе ў сістэму ўлады, шматкротная рэгістрацыя і здача зброі і т.п.) – усё гэта прыкметы планавай расейскай падрыхтоўкі да часу “Х”. Паводзіны гэтай сатанінскай краіны – Расеі – нам добра вядомыя. Злачынны калгасны рэжым дазволіў ёй беспакарана дзейнічаць у Беларусі.

Мушу падкрэсьліць тыя палажэньні, пра якія казалася летам 2017 года, аб схаванай падрыхтоўцы да супраціву расейскай гібрыднай агрэсіі (аб’яднаныя асобы, рыштунак і т.п.). Гэта ўсё ўвесь час актуальна. У Расеі няма будучыні. Усе іхныя жаданьні (СССР, Сталін і т.п.) у мінулым. Патрэбна вытрымка. Разуменьне і разумная праца, перш чым настане пара.

13 траўня 2018 г.                                      Зянон Пазьняк


ДА ПЫТАНЬНЯ ПРА АДСУТНАСЬЦЬ ВЫБАРАЎ АЛЬБО ЯК ЛЮДЗЬМІ ЗВАЦЦА

posted May 5, 2018, 9:38 AM by Адміністратар Навін   [ updated May 5, 2018, 9:38 AM ]

18 лютага гэтага года адбыліся чарговыя псэўдавыбары ў мясцовыя саветы. Абстаўлена ўсё было цынічна і бессаромна. Выпрабоўвалі грубыя фальсіфікатарскія тэхналёгіі ("карусэлі", укіды бюлетэняў, "паролі" для "сваіх" і т. п.). Рэжым ужо ня бачыць патрэбы хавацца ў ілжы, маскавацца і прыкідвацца, што адбываюцца нібы та "выбары". Ён бачыць, што грамадзтва дэмаралізаванае, воля яго зламаная, яно, маўляў, успрыме ўсё, любую хлусьню, любую лухту і будзе маўчаць.

Захад, які праваліўся ў Беларусі з сваёй нікчэмнай прарасейскай палітыкай (пад выглядам дэмакратыі) будзе таксама маўчаць, што б ні сталася, бо ні на якія рашучыя дзеяньні ён ня здольны.

Адпаведна з дэградацыяй грамадзтва крок за крокам, дзень за днём, раз за разам ідзе нішчэньне Беларусі, і вынікі гэтага пэрманэнтнага нішчэньня адбіваюцца ў людзях ва ўсім пакаленьні.

Выбарчае фальшаваньне выявіла шмат тэставых прыкмет дзеля характарыстыкі цяперашняга становішча ў Беларусі. Людзі ў чарговы раз без супраціву і нараканьняў далі сябе загнаць на антыдэмакратычнае так званае "папярэдняе" галасаваньне. На ўзроўні сучаснага вопыту псэўдавыбараў у Беларусі гэта абазначае, што грамадзтву ў цэлым няма справы дзеля сваёй будучыні і будучыні сваёй краіны. Выходзіць, што можна ўдзельнічаць у амаральных дзеяньнях, калі яны арганізаваныя ўладай, можна ўдзельнічаць, каб ня мець потым асабістых клопатаў. Гэтак жа сама паводзіць сябе "настаўніцкі корпус", які абслугоўвае фальшывыя выбары.

Студэнцтва горада Менска на 96,4 адсоткі ў першы ж дзень загону прыняло ўдзел у "папярэднім галасаваньні". Няма падставы лічыць, што астатнія 3,6 адсоткаў, што не галасавалі, -- гэта альтэрнатыўная частка моладзі. Пры такім раскладзе, які ўтварыўся, большае значэньне маюць розныя выпадковыя сітуацыйныя чыньнікі (захворваньні і т. п.).

Фармальная выснова, якая механічна вынікае з гэтай падзеі, -- беларуская нацыя ў сучасным маладым пакаленьні, што вырасла пры клгасным рэжыме, ня мае будучыні. Мэнтальныя нявольнікі яе ня ймуць. Будучыня краіны будзе залежыць ад іншых чыньнікаў. І вырашаць трэба хутчэй.

Тым часам высновы, якія я тут агучваю, ня могуць мець абсалютнага значэньня, бо прычыны ўлеглых паводзінаў людзей у значнай ступені абумоўленыя сітуацыйным характарам дыктатуры і таталітарнай сістэмы ўлады, якая ўстанавіла кантроль над кожным чалавекам. Карціна практычна паўсюдна аднолькавая ва ўсіх дыктатарскіх антынародных і рэпрэсіўных рэжымах.

На практыцы гэта выяўляецца ў тым, што калі, напрыклад, настаўнік ня пойдзе ілгаць на фальшывыя выбары, то рызыкуе страціць пасаду, працу, вучэбныя гадзіны і г. д. Кожны вымушаны прымаць індывідуальнае рашэньне і кожнаму можа пагражаць індывідуальная рэпрэсія. Кожны ў адзіночку апынаецца перад усёй рэпрэсіўнай машынай ўлады, якая можа яго раздушыць. (Пасьпяхова змагацца супраць антыпраўнай сістэмы можна толькі масавай арганізацыяй і калектыўнымі дзеяньнямі.)

Тое ж і са студэнтамі, якіх могуць выключыць з вучэльні, пазбавіць стыпендыі, заваліць на экзамене і г. д. Тое ж і з працаўнікамі, зь якімі могуць незаключыць кантракт, панізіць у пасадзе, пазбавіць прэміі і г. д.

Кожны сам па сабе з сістэмай змагацца ня ў сілах. Сістэма ўлады абавязкова выйграе, а грамадзтва абавязкова дэградуе. Дэградуе, пакуль не пачне самаарганізоўвацца і змагацца калектыўна, ствараючы сваю сістэму ўзаемнай падтрымкі і салідарнасьці.

Акупацыйную сутнасьць здрадніцкага рэжыму высьвятляюць надзвычайныя факты. У мясцовыя саветы рэжымная ўлада не прапусьціла ніводнага альтэрнатыўнага для рэжыму кандыдата (нават з тых, што ўдзельнічалі ў фальшывых выбарах і дапамагалі рэжыму ствараць уражаньне выбараў). Тым часам у псэўдавыбарах прымаў ўдзел 21 грамадзянін Расеі. (Тут цынічны акупацыйны абсурд). Уся руская агентура ў колькасьці 21-й асобы была прапушчана ў беларускія саветы. Паколькі ЦВК узначальвае крэатура ФСБ, то тут магчыма ўжо нават і ў Лукашэнкі не пыталіся. Але зразумела, што без яго гэты акупацыйны ўкід не абышоўся.

Усё часьцей рэжым адкрыта зьвяртаецца да мэтодыкі савецкага мінулага ў арганізацыі ўлады, эканомікі, ідэалёгіі і прапаганды. Сталінізм, савецкія даты, савецкія асобы сталі звыклай карцінай у выяўленьні рэжымнай палітыкі. У апошні час пачалі аднаўляць і нахвальваць імя былога сакратара ЦК КПБ Машэрава. З усёй камуністычнай верхавіны ўлады ў Беларусі, пачынаючы ад 1919 года, гэта была самая шкодная фігура для быцьця беларускай нацыі. Ён выконваў самыя антычалавечыя распараджэньні Масквы па падрыве існаваньня беларускага этнасу, народа і культуры. Яго дзейнасьць мае прыкметы злачынства супроць чалавецтва. Галоўныя яго злачынствы:

-- ліквідацыя беларускіх школ у гарадах і мястэчках; ліквідацыя беларускай адукацыі, русіфікацыя краіны пад выглядам пабудовы камунізма;

-- разбурэньне прыроднага вобразу краіны, ліквідацыя малых рэк шляхам спрастаньня рэчышчаў, татальная меліарацыя тэрыторыі, што прывяло да непапраўных дрэнных зьмен у прыродным асяроддзі, клімаце, прыродзе і экалогіі;

-- пачатак ажыцьцяўленьня грандыёзнага антынацыянальнага плану па зьнішчэньні беларускага этнасу шляхам ліквідацыі (на першым этапе) больш за 70 адсоткаў беларускіх вёсак як "непэрспэктыўных" для жыцьця (з 34 тысяч вёсак плянавалі на першым этапе зьнішчыць 25 тысяч і пакінуць 9 тысяч).

Гэты плян ужо тады прынёс шмат гора людзям, але да канца ня быў ажыцьцёўлены. Яго ў іншай мадыфікацыі падхапіў рэжым Лукашэнкі (у рэчышчы той жа маскоўскай антыбеларускай стратэгіі). Вынік -- беларуская вёска хутка вымірае (разам з носьбітамі мовы і традыцыйнай культуры).

-- Стварэньне фальшывай міфалогіі аб савецкім партызанскім руху ў Беларусі, інсьпіраванага маскоўскім НКВД. Татальная, без разбору, гераізацыя злачынстваў савецкіх партызанскіх бандаў супраць беларускага народа. (Таксама стварэньне сабе культа галоўнага партызана, арганізатара і натхняльніка партызанскага руху ў Беларусі.)

-- Арганізацыя зьнішчэньня гістарычнай забудовы Менска (вуліцы Нямігі і прылеглых раёнаў);

-- эканамічныя і экалягічныя злачынствы: галоўныя зь іх -- гэта ператварэньне Беларусі ў гіганцкі сьвінакомплекс дзеля кармленьня ўсёй Расеі. (Сьвінафермы па 50, 100, і нават 200 тысяч сьвіней -- сталі магутным ўдарам па экалёгіі і акаляючым асяроддзі.)

Да такога ж роду вар'яцкіх рашэньняў гэтага самадура адносіцца так званая апэрацыя "галінкі", праведзеная ў 1970-х гадах. Атрымаўшы паведамленьне ад сіноптыкаў аб засушлівым леце, Машэраў аддаў загад па ўсёй Беларусі вырубаць хмызьнякі, галінкі дрэў у лясах, здрабняць іх і сіласаваць у ямах дзеля кармленьня кароў. На працягу месяца тысячы машын, аўтобусаў, сотні тысячаў людзей па ўсёй Беларусі былі задзейнічаныя на сьсяканьне хмызьнякоў, галінак дрэў і сіласаваньне іх у калгасах. Для падвозу людзей задзейнічаныя былі цэлыя аўтобусны паркі, машынныя рэсурсы прадпрыемстваў. Лугі і сенажаці ніхто не касіў. Тым часам лета было пагодным і не засушлівым.

Эканамічнае злачынства было надзвычайным, страты каласальныя. Але тут істотная не эканоміка. Каровы лісьце і галінкі дрэў, зразумела ж, не ядуць. Жывёла здохне, але есьці хмызьняк ня стане. Гэта вядома ўсім людзям і дзецям. І тым ня менш, уся нацыя, сотні тысячаў людзей пад трэск газэтна-тэлевізійнай прапаганды рабіла дурную працу, разумеючы, што ўдзельнічаюць у вар'яцтве. (Дарэчы, кожнаму секачу дрэў захоўвалася зарплата па месцы працы.)

Тут ізноў жа мы бачым псіхалягічны фэнамэн таталітарнага рэпрэсіўнага рэжыму, дзе людзі прыраўняныя да насельнікаў канцлягера, нявольнікаў без нацыі і культуры, зэкаў на лесапавале, якія думаюць толькі пра пайку. Бальшыня людзей усьведамляла шызоідны ідыятызм акцыі Машэрава, але вымушаныя былі ў ёй ўдзельнічаць пад страхам звальненьня з працы. Сьмяяліся з загаду,, высьмейвалі свой "мартышкін труд", але дрэўцы секлі.

Вынікі мэнтальнасьці таталітарызму трэба мець на ўвазе. Такая псіхалогія нікуды ня падзелася. І справа ня толькі ў саветызме, ня толькі ў "саўку". Справа ў дэнацыяналізацыі, у дэградацыі нацыянальна-культурнай сьвядомасьці, у дэгенерацыі асобы праз пазбаўленьне ад нацыянальнай годнасьці, ад нацыянальнай мовы, ад нацыянальнага веданьня, думаньня і пачуцьця.

Нашчадкі гэтых "зэкаў" па нарыхтоўцы хмызьняку для кароў цяпер усхваляюць Машэрава і галасуюць за Лукашэнку, ідуць на фальшывыя выбары.

Вырасла пакаленьне "белага ліста" -- людзей, якія нічога ня ведаюць пра нацыянальную і чалавечую гісторыю народаў і чалавецтва, нават пра тое, што сталася 20-30 гадоў таму ў іхняй краіне. Грамадзтва перамянілася. 23 гады антыбеларускай палітыкі пакінулі глыбокі разбуральны сьлед.

Які выхад са становішча? Дзе дарога ў будучыню? Яна ёсьць, існуе ўвесь час і ўсюды. Нацыю аб'ядноўвае, стварае і сцьвярджае Нацыянальная ідэя. І толькі яна. А гэта значыць -- трэба ведаць і шанаваць сваю Беларускую мову, свой народ, сваю краіну і гісторыю, любіць сваё, жыць па-людзку, мець гонар і годнасьць асобы.

Калі гэтага не трымацца, не шанаваць і ня мець, то застанецца толькі шлях да магілы, нават тады, калі ён будзе ўсланы кветкамі, музыкай і сьпяваньнем сірэн. Хоць на справе ён усланы ахвярамі генацыду без віны вінаватых, Курапатамі, крывёй і морам ілжы.

Наша нацыянальная ідэя даўно сказана ў словах прарока -- каб дасягнуць шчасьця, трэба захацець называцца людзьмі.

Люты-травень 2018 г.                     Зянон ПАЗЬНЯК

Чарнобыльскі шлях – наканаваньне, якое мусім прайсьці

posted Apr 26, 2018, 4:23 PM by Адміністратар Навін   [ updated Apr 26, 2018, 4:23 PM ]

Паважаныя землякі-беларусы.

Паважаныя спадарыні і спадары, сёньня ў гадавіну радыяцыйнай трагедыі нашага народа ўспомнім са скрухай, пашанай і жалем усіх загінулых і памерлых ад нябачнага і сьмяртэльнага дракона Чарнобыля. Скажам пра сутнасьць падзеі , якая называецца “Чарнобыльскі шлях”.

У 1989 годзе, калі я прапанаваў штогадовую помную акцыю “Чарнобыльскі шлях”, яна была ўспрынята ўсім Народным Фронтам і ўсім насельніцтвам Беларусі, бо ўсе разумелі, што нашае грамадзтва, уся нацыя ступіла на дарогу небывалай трагедыі, на шлях, які будзе доўжыцца пакаленьнямі, які наканавана мы мусім прайсьці, змагаючыся з радыяцыйным цмокам, дбаючы пра жыцьцё, здароў’е і будучыню. Гэта шлях выжываньня, хоць цемра будзе “ладзіць нам канвой”, як сьпявалася тады ў Фронтаўскім гімне. Але тады мы не баяліся цемры і перамагалі.

Камуністы, пануканыя з Масквы кінулі міліцыю, унутраныя войскі і заблякавалі, перакрылі ўсе дарогі ў Менск. Але ўсяроўна, ня гледзячы ні на што, і нават на праліўны дождж на першы “Чарнобыльскі шлях” сабраліся дзясяткі тысячаў людзей і прайшлі шэсьцем праз увесь горад, стварыўшы мітынг на плошчы, які ўвайшоў у гісторыю.

Чарнобыльскі шлях – гэта помны шлях пакаленьняў у выніку якога мы, Беларускі народ, мусім выжыць і перамагчы катастрофу, якая пачалася за савецкім заборам яшчэ да Чарнобыля, а Чарнобыль стаў кульмінацыяй вынішчэньня.

У 1950-1970-я гады савецкія акупацыйныя войскі, якія стаялі на тэрыторыі Беларусі, праводзілі стэльбы з атамных гарматаў, выпрабоўвалі тактычную атамную зброю на палігонах Гомельскай і Берасьцейскай вобласьцяў. Тады ад Каленкавічаў да Жыткавічаў праз лясы і балоты праклалі роўную як страла бетонную паласу для савецкіх атамных бамбардыроўшчыкаў. Эксперыментавалі на галовах беларускага народа, абвалілі на Палесьсе сьмяртэльны груз радыяцыі. І ўсё гэта акупанты засакрэцілі.

У пачатку 1970 гада былі ўзятыя пробы малака на прадмет выяўленьня радыяцыі па ўсёй Беларусі. Высьветлілася, што ўвесь поўдзень Беларусі ад Кармы, Рагачова, Чачэрска і аж да Берасьця і нават Івянца і Валожына – усё забруджана радыёактыўным ізатопам цэзія – 137. Канцэнтрацыя ад 50 кюры на літар малака да больш чым 1000 кюры на літар. Асабліва высокая радыяцыя (больш 1000 кюры на літар) у раёне Лельчыцаў – Петрыкава – Лунінца – Пінска – Давыд-Гарадка – Століна, Маларыты.

Менавіта з гэтай радыяцыяй зьвязана пагаршэньне здароўя і сьмяротнасьць беларускіх людзей, зьніжэньне нараджальнасьці і папуляцыі насельніцтва. Чарнобыль зьверху ўзмацніў няшчасьце нашай краіны.

Чарнобыльская аварыя, якую падрыхтавалі і зрабілі маскоўскія акупанты , доўжыцца па сёньняшні дзень як сэрыя злачынстваў супраць беларускага народа. Найперш усё засакрэцілі, не давалі людзям праўдзівай інфармацыі, ілгалі.

Другое – не зрабілі неабходных захадаў (простых, танных, і вядомых) дзеля прадухіленьня радыёактыўнага ўдару ад кароткажывучых ёдзістых ізатопаў, якя ападалі ў пачатку аварыі. Наадварот, рабілі ўсё, каб падставіць беларусаў пад абпраменьванье, пагналі тысячы дзяцей на першамайскія дэманстрацыі і наступныя савецкія сьвяты.

Трэцяе – засакрэцілі вынікі, маштабы і небясьпечнасьць катастрофы, не адсялялі людзей , не рабілі антырадыяцыйнай прафілактыкі, не стваралі ніякага заканадаўства. І так тры гады пасьля аварыі, пакуль Беларускі Народны Фронт, які ўзьнік у канцы 1988 года, цягам дзўгага змаганьня не прымусіў іх тое рабіць, для паратунку людзей.

Чацьвёртае – яны растрэльвалі спэцыяльнымі арэазолямі радыёактыўныя хмары і апускалі іх на голавы беларусаў Магілёўскай вобласьці, бо не хацелі, каб патрохі распадаліся яны над Расеяй. У выніку акупанты зрабілі яшчэ адну катастрофу ў Магілёўскай вобласьці, дзе ўзровень радыяцыі такі ж як і вакол Чарнобыля.

Сёньняшні антыбеларускі рэжым працягвае чарнобыльскі генацыд. Ён ліквідаваў льготы і дапамогі насельніцтву на радыяцыйна забруджаных тэрыторыях, уводзіць у севазварот радыяцыйна небясьпечныя землі. Прадукты з радыяцыйных земляў ідуць на ўнутраны рынак беларускаму насельніцтву, а прадукты з чыстых земляў накіроўваюць у Расею, карміць “руский мир”,нішчыцеляў Украіны і Беларусі.

Радыяцыйны генацыд Беларускага Народа працягваецца. Мы мусім змагацца з гэтай палітыкай нашага вынішчэньня ворагамі чалавецтва. Чарнобыльскі шлях тут напамін аб неабходнасьці змаганьня і яднаньня ўсіх пакаленьняў беларусаў дзеля нашай сьветлай будучыні і здаровага існаваньня.

Хай будуць праклятыя тыя людзі і тое царства, якое наканавала нам гэтае вынішчэньне! Хай ператворацца ў попел іхныя вежы і гарады! Хай спаткае іх доля, якую яны стварылі іншым, не пакаяўшыся і не спыніўшыся ў зле. Вечнае пракляцьце ворагам чалавецтва, якія ненавідзяць увесь сьвет.

Памятайма пра Чарнобыль і Чарнобыльскі шлях. Мы, беларусы, мусім па ім ісьці, каб уратавацца, выжыць і адрадзіцца. Будучыня будзе лепшай. Майма веру і салідарнасьць.

Жыве Беларусь і будзе жыць!

26.04.2018                                  Зянон Пазьняк

У Менску адбыўся мэмарыяльны мітынг да гадавіны Чарнобыльскай катастрофы

posted Apr 26, 2018, 4:21 PM by Адміністратар Навін   [ updated Apr 26, 2018, 4:21 PM ]

26 красавіка ў Менску ў Кіеўскім сквэры на Булвары Шаўчэнкі адбыўся мэмарыяльны мітынг з нагоды 32-й гадавіны Чарнобыльскай катастрофы, арганізаваны Кансэрватыўна-Хрысьціянскай Партыяй – БНФ. Людзі прышлі ў гэты прыгожы сталічны цэнтр, пад нацыянальнымі Бел-Чырвона-Белымі Сьцягамі. Сабраліся менчукі і беларусы зь іншых гарадоў краіны.

Грамада выслухала выступ сп. Зянона Пазьняка, Старшыні БНФ “Адраджэньне” і КХП-БНФ, -- “Чарнобыльскі шлях – наканаваньне, якое мусім прайсьці”. Старшыня Партыі акцэнтаваў свой выступ на дачарнобыльскай радыяцыі ў Беларусі, якую стварыла савецкае акупацыйнае войска ў 1950-1970-х гадах, калі таемна на беларускіх палігонах выпрабоўвала тактычную атамную зброю. Цяперашняя ўспышка анкалагічных і сардэчных захворваньняў насельніцтва зьвязана якраз з тымі схаванымі ад людзей атамнымі выпрабаваньнямі.

Выступіў сп. Георгі Лепін, доктар фізіка-матэматычных навук, дасьледчык наступстваў Чарнобыльскай катастрофы, аўтар кніг на гэтую тэму. Навуковец казаў пра недапушчальнасьць пабудовы атамнай электрастанцыі ў Беларусі, пра небясьпечнасьць месца, дзе ідзе будаўніцтва Астравецкай АЭС, прыводзіў факты і статыстыку, якія сьведчаць пра адмоўны досьвед ва ўсіх адносінах з атамнымі электрастанцыямі ва ўсім сьвеце. Ён завершыў свой выступ патрабаваньнем спыніць будаўніцтва пад Астраўцом і мабілізаваць сілы грамадзтва для недапушчэньня пабудовы новага Чаргобыля для нашага народу і суседзяў Беларусі.

Адзін з арганізатараў мітынгу адказны сакратар Управы Фронту і Партыі сп. Алесь Чахольскі, ліквідатар наступстваў катастрофы, распавёў пра тое, як бяздарна і злачынным чынам савецкія ўлады праводзілі гэтую апэрацыю. Бессэнсоўна і бяздарна тысячы людзей займаліся так званай “дэзактывацыяй” на атручаных радыёнуклідамі тэрыторыях, зь якіх пазьней ўсяроўна давялося адсяляць насельніцтва і закапываць бульдозэрамі цэлыя вёскі. І вось зноў на нашай зямлі чужая і варожая сіла – Масква – рэалізуе злачынную задуму: будуе расейскую, чужую і непатрэбную нам АЭС у Астраўцы. Маўчаць і цярпець нельга. Увесь народ павінен змагацца за сваю будучыню, за сваіх дзяцей. Над краінай зноў навісла пагроза атамнай катастрофы.

З прамовай выступіў сп. Сяргей Папкоў, намесьнік старшыні Фронту і Партыі. Ён падкрэсьліў, што супраць нашага народа вядзецца вайна. Як яшчэ можна назваць дзейнасьць Масквы, накіраваную на зьнішчэньне нашага народа, нашай культуры і цывілізацыі? Калі гэта так, то і мы павінны дзейнічаць, абараняцца. Імпэрскае зло пранікла паўсюль. На харчовых прадпрыемствах дзейнічаюць два канвэеры. Адзін канвэер для вырабніцтва чыстай і якаснай прадукцыі – гэта вывозіцца ў Маскву. Для беларусаў – другі канвэер, дзе вырабляюць атручаныя радыёнуклідамі харчовыя прадукты. Штогод рэжым пашырае пасяўныя плошчы на тэрыторыі, зараджаныя ў выніку Чарнобыльскай катастрофы. Ніякай гаспадарчай мэтазгоднасьці ў гэтым няма. Рэжым на загад Масквы праводзіць злачынны экспэрымэнт над нашым народам. На жаль, большасьць нашых грамадзян нават не задумваюцца над гэтым. Грамадзтва павінна ўсьведаміць, што так далей жыць нельга.

Сакратар Управы Фронту і Партыі сп. Валеры Буйвал нагадаў, хто адкрыў сьвету праўду пра Чарнобыльскую катастрофу і абваліў мур рэжымнай хлусьні на гэтую тэму. У верасьні 1989 года БНФ “Адраджэньне” паслаў ва ўсе пацярпелыя раёны групы сваіх актывістаў на аўтамабілях. Фронтаўцы сустракаліся з людзьмі, наведвалі гаспадаркі, шпіталі, зьбіралі інфармацыю і подпісы грамадзян з патрабаваньнем арганізацыі дапамогі пацярпелым ад чарнобыльскай бяды. У Менску быў праведзены шматтысячны Чарнобыльскі шлях. У сьнежні БНФ арганізаваў у Чырвоным касьцёле міжнародную канфэрэнцыю на чарнобыльскую тэму і стварыў Чарнобыльскі Трыбунал. Сьвет даведаўся праўду, і ўжо з вясны 1990 года ў Беларусь пайшла гуманітарная дапамога з розных краін. Народны Фронт арганізаваў першыя групы дзяцей з пацярпелых раёнаў на аздараўленьне за мяжой. Ужо на пачатку 2000-х гадоў рэжыму ўдалося (дзякуючы пасіўнасьці насельніцтва) амаль поўнасьцю спыніць паступленьне гуманітарнай дапамогі і выезды дзяцей за мяжу, арганізаваць ізаляцыю нашага грамадзтва ад цывілізаванага сьвету. Рэжымныя ворагі робяць гэта дзеля “чысьціні экспэрымэнту” над беларусамі. Толькі грамадзкі супраціў можа разбурыць гэтую антычалавечую сістэму, якая пагражае самому існаваньню нашага народа. Рашэньне гэтай жыцьцёвай праблемы можа быць толькі палітычным. Наш народ вызваліцца ад імпэрскага кашмара і будзе жыць у вольнай дэмакратычнай краіне. Наперадзе аналаг Нюрнбэргскага працэсу над злачынцамі, якія праводзяць пачварны экспэрымэнт над беларусамі. Будучыня Беларусі будзе сьветлай і прыўкраснай.

Свае пранікнёныя вершы прачытала паэтка Яўгенія Казлова (Ворша).

На прыканцы грамада засьпявала беларускі нацыянальны гімн “Магутны Божа”. Лунаў покліч “Жыве Беларусь! Жыве вечна!”

Інфармацыйная камісія Кансэрватыўна-Хрысьціянскай Партыі – БНФ

26 красавіка 2018 г. 

ЧАРНОБЫЛЬ - АСТРАВЕЦКАЯ АЭС 2018

posted Apr 25, 2018, 8:16 AM by Адміністратар Навін   [ updated Apr 25, 2018, 8:16 AM ]

26 красавіка, з 18-00 да 20-30, ў Кіеўскім скверы г. Менску адбудзецца мітынг з нагоды 32-й гадавіны Чарнобыльскай трагедыі. Арганізатар Кансэрватыўна-Хрысьціянская Партыя – БНФ.

Кіруючы рэжым працягвае вырабляць атручаныя радыяцыяй прадукты на забруджаных радыяцыяй тэрыторыях. Пры гэтым пачынаючы з пачатку 2000-х гадоў рэжым рэгулярна ўводзіць у сельгасвыторчасьць дадатковыя забруджаныя плошчы. Уведзены дзесяткі тысяч га. Так у гэтым 2018 г пастановай №8 за 08.01.2018 Савет Міністраў у чарговы раз задзейнічаў 1600 га брудных земляў на Гомельшчыне. Радыяцыйныя прадукты зьяўляюцца галоўнай прычынай хваробаў беларусаў. Прадукты з чыстых тэрыторый адпраўляюцца ў Расею, а беларусам – з атрутай.

Да Чарнобыльскай трагедыі рэжым наклікае новую бяду на наш народ. Пусьціў пад Астравец расейцаў, якія будуюць небясьпечную АЭС, абсалютна непатрэбную для энергазабеспячэньня Беларусі.

Запрашаем на мітынг-пратэст. Маецца дазвол Мінгарвыканкама.

Інфармацыйная камісія КХП-БНФ

Чарнобыльская трагедыя. Фільм ВВС

posted Apr 25, 2018, 8:12 AM by Адміністратар Навін   [ updated Apr 25, 2018, 8:13 AM ]

Чарнобыльская трагедыя. Фільм ВВС

https://www.youtube.com/watch?v=JtsJJziFdJ8


У Менску адбудзецца мітынг з нагоды ўгодкаў Чарнобыльскай катастрофы

posted Apr 23, 2018, 6:51 PM by Адміністратар Навін   [ updated Apr 23, 2018, 6:52 PM ]

26 красавіка з 18.00 да 20.00 у Менску рыхтуецца мэмарыяльны мітынг да 32-й гадавіны Чарнобыльскай катастрофы.

Мітынг адбудзецца ў Кіеўскім сквэры, на пляцоўцы побач з кінатэатрам “Кіеў”, перасячэньне вул. Кахоўскай і бульвара Шаўчэнкі. Блізка праходзіць таксама вул. Арлоўская, прыпынак “Кіеўскі сквэр” (трал. 12, 33, 38, 40; аўтобус 38).

Арганізатар мерапрыемства – Кансэрватыўна-Хрысьціянская Партыя – БНФ. Атрыманы дазвол Менгарвыканкама.

Інфармацыйная камісія Кансэрватыўна-Хрысьціянскай Партыі – БНФ

23 красавіка 2018 г.

1-10 of 1829