ЯШЧЭ РАЗ АБ ПРАФАНАЦЫІ "ПЕРАПІСУ"

posted Oct 24, 2019, 8:26 AM by Адміністратар Навін   [ updated Oct 24, 2019, 8:26 AM ]

        Так званы "перапіс" насельніцтва Беларусі як палітычна-акупацыйнае мерапрыемства рэжыму працягваецца далей, але, як зьява, ўжо цалкам правалена. Тое, што вытварае рэжым зь перапісам, ніякім перапісам не зьяўляецца. Гэта напоўкрымінальны збор інфармацыі з падтасоўкай адказаў па асноўных пытаньнях і з абдурваньнем людзей.

        Назіраючы за гэтым працэсам шальмаваньня народу, можна зразумець важную тэхналягічную неабходнасьць перапісу. Перапіс насельніцтва павінен адбывацца выключна на папяровых фармулярах шляхам апытаньня і запісаў, якія кантралюе і падпісвае апытаная асоба і апытальшчык. Такім чынам застаецца архіўны дакумант і аўтаматычна зьяўляецца кантроль людзей за перапісам.

        Тое, што прыдумаў рэжым, -- гэта цынічны зьдзек над людзмі. Апытаньне заносіцца " фіксавальшчыкам" у "таблет" шляхам прыцісканьня пальчыкам, ці курсорам розных кнопачак. (Бальшыня людзей нават ня бачыць, што там атрымалася). Але справа нават ня ў гэтым. Магнітную інфармацыю, занесеную ў таблет, потым можна зьмяніць як заўгодна, было б жаданьне і ўменьне. Можна таксама ліквідаваць увесь запіс і цалкам перапісаць фармуляр. Таблет у перапісе -- гэта шулерства.

        Дакумэнтальна мае значэньне і паддаецца кантролю толькі тое, што запісана на доўгатрывалым матэрыяле.

        Дарэчы (іншая тэма), тут я закранаю аснову асноваў фіксаваньня чалавечай гісторыі. Элекрамагнітная інфармацыйная цывілізацыя можа абваліцца за адзін дзень, з усімі сваімі "гугламі". Патопу не спатрэбіцца. Вавілонскую вежу награмазьдзілі настолькі, што яна ўжо можа абваліцца сама пад цяжкасьцю сваёй канструкцыі.

        Пішыце кнігі, спадары. Друкуйце газэты. Напісанае -- застанецца.

23 кастрычнік 2019 г.                                                      Зянон ПАЗЬНЯК