АГЛЯД ЗАМЕЖНАГА ДРУКУ (21.I.2011)

21 студзеня 2011 г. Польская газэта “Gazeta Wyborcza” апублікавала камэнтары шэрагу польскіх палітыкаў наконт апошніх выказваньняў Лукашэнкі пра тое, што “праграмы зьвяржэньня канстытуцыйнага ладу ў Беларусі пісаліся ў Нямеччыне і Польшчы”. Палітыкі даюць наступныя камэнтары: “Паскудная дыктатура”, “Ён жартуе з Сікорскага”, “Апошні крык агоніі”, “Лукашэнка слабее”.

Наш камэнтар: Цікава, што ў шматслоўных камэнтарах у польскіх палітыкаў не знайшлося сымпатыі для беларусага народу, да змагарных людзей, якія супрацьстаяць дзікай дыктатуры. Падобна, што яны да таго ж зьбіраюцца зноў рабіць рэкляму розным пустышкам-мілінкевічам і займацца імітацыяй падтрымкі барацьбы за дэмакратыю ў Беларусі.

21 студзеня 2011 г. Летувіская газэта “Lietuvos Rytas” напісала пра дыскусію ў Маскве пра муміяю Леніна, якая ляжыць у маўзалеі на Чырвонай плошчы. Старшыня таварыства “Мэмарыял” Арсеній Рагінскі патрабуе выдаліць Леніна з маўзалея і пахаваць. Ён называе яго адказным за стварэньне сістэмы дзяржаўнага тэрору, якая дзейнічала ў СССР на працягу 70 гадоў. Прадстаўнік рады па правах чалавека пры прэзыдэнце РФ М. Фядотаў паабяцаў паставіць пытаньне пра маўзалей і Леніна. Фядотаў супраць таго, каб “прысьпешваць гэты працэс” і за тое, каб “абмеркаваць пытаньне ў грамадзтве”.

Наш камэнтар: Масква ўжо дваццаты год носіцца з сваёй ленінскай муміяй пасьля таго, як абвясьціла сябе “православнейшей” і “святой Русью”. Яны ўжо ўсім надакучылі і з першым і з другім, з усёй гэтай лубянскай сьвятасьцю і крамлёўскай пасіянарнасьцю — суцэльнай фальшывай эклектыкай імпэрскага монстра.

21 студзеня 2011 г. Латвійская газэта “Diena” перадрукавала афіцыйныя расейскія статыстыкі пра прызыў маладых у расейскую армію. Генэрал, адказны за мабілізацыю, прызнаў, што да вайсковай службы прыдатныя толькі 30% расейскіх хлопцаў. Многія пазьбягаюць службы, паступаюць у інстытуты, даюць хабар і г.д.

Наш камэнтар: Расейскія хлопцы з большага ня хочуць калечыцца і паміраць за тлустых мафійных катоў з Крамля-Лубянкі і крывавага бізнэсу, за дзікую імпэрыю. Ды і здароўя няма ў бальшыні.

21 студзеня 2011 г. Румынская газэта “Evenimentul Zilei” паведаміла, што краіны Эўразьвязу замарозілі рахункі зьвергнутага дыктатара Туніса Бэн Алі.

Наш камэнтар: Гэта ёсьць вельмі адэкватныя дзеяньні, накіраваныя супраць антынароднай дыктатуры.

21 студзеня 2011 г. Польская газэта “Zycie Warszawy” апублікавала артыкул пад тытулам “Дыктатар прыняў прысягу” пра “інаўгурацыю” Лукашэнкі.

Наш камэнтар: Падчас фальшывай выбарчай кампані нешта газэты Эўропы не ўжывалі такой лексікі. Усё ў іх было на поўным электаральным сур'ёзе, яны зьбіраліся “выбары” прызнаць. Цяпер, пасьля правалу заходняй крывадушнай палітыкі яны лексіку зьмянілі.