ЗАМЕЖНЫ ДРУК (14–16.05.2011)

14 траўня 2011 г. швэдская газэта “Dagens Nyheter” апублікавала артыкул пад тытулам “Медведев робіць стаўку на дзяцей”. Апісана, як у выступе перад Дзярждумай прэзыдэнт РФ прапанаваў павялічыць выплаты сем'ям, якія нараджаюць дзяцей, даць ім лепшае жыльлё і г.д. Заклікаў да больш строгіх пакараньняў за злачынствы супраць дзяцей.

Наш камэнтар: Можа для швэдаў гэта і навіна (а можа нават і сэнсацыя), а ў Расеі ды і ў іншых постсавецкіх краінах усе разумеюць, што ў Маскве проста пачалася перадвыбарчая прэзыдэнцкая кампанія. Пуцін шыхтуе “народны фронт” — вельмі сьмешна назіраць, як на тэлеэкране актыўна дзейнічаюць намэнклатуршчыкі-“фронтаўцы”, халёныя і цынічныя. А Медведев, як бачым, абраў амплуа абаронцы дзяцей. Ніхто ўжо даўно ня верыць у гэтую пустую балбатню.

14 траўня 2011 г. славацкая газэта “Novy Cas” напісала аб тым, як прэм'ер Расеі Пуцін прыляцеў у Браціславу на 2-гадзінны візыт. Усіх уразіла, што прыляцеў ён на чатырох самалётах (!). На адным “Іл” прыбыў сам Пуцін, на двух наступных ягоны сакратарыят і ахова. На чацьвертым прыляцелі расейскія журналісты. Пуцін паглядзеў хакейны матч, пагаварыў з кіраўніцтвам краіны пра энэргетыку.

Наш камэнтар: Лубянскі візір умее абставіць помпай сваю пэрсону. І вельмі марыць зноў вярнуцца на пасаду султана.

14 траўня 2011 г. чэшская газэта “Lidove Noviny” апублікавала артыкул пад тытулам “Медведев: Без Расеі супрацьракетны шчыт не стаўце”. Прэзыдэнт Расеі разаслаў ліст па ўсіх заходніх краінах, у якім пераконвае іх кіраўніцтва будаваць шчыт разам і падзяліць абарону на сэктары. Захад будзе бараніцца на сваім накірунку, а Расеі бараніць усіх з Усходу. Газэта напісала: “Для большасьці краін НАТО такая ідэя непрыймальная”.

Наш камэнтар: Ён што, не разумее, што антыракетны шчыт рыхтуецца якраз для абароны заходніх краінаў ад Расеі? Калі ў 1949 г. утваралася НАТО, Сталін таксама загадаў сваёй прапагандзе трубіць, што СССР ня супраць далучыцца да гэтага вайсковага блоку. Ён таксама ўдаваў неразуменьне таго, што заходнія краіны ставяць блок якраз з мэтай абароны ад Масквы.

15 траўня 2011 г. італьянская газэта “Repubblica” паведаміла пра перамогу на песенным конкурсе “Эўрабачаньня” дуэту з Азэрбайджану. У Баку пераможцаў сустракалі дзесяткі тысячаў людзей, адбылося яркае народнае сьвята.

Наш камэнтар: Безгалосая прадстаўніца калгаснай эстэтыкі позьняга лукашызма з РБ ня выйшла нават у фінальную дзясятку. Гледачы нізка ацанілі яе “ін'язаўскі” тэкст па-ангельску пра “Беларашу” і афармленьне сцэны ў выглядзе арнамэнта з лукашысцкага сьцяга РБ-БССР.

16 траўня 2011 г. нямецкая газэта “Die Welt” напісала пра закалоты на мяжы Ізраіля. У сувязі з набліжэньнем гадавіны абвяшчэньня Дзяржавы Ізраіль улады краіны чакалі новай палесцінскай інціфады ў Палестынскай аўтаноміі. Але нечакана на поўначы краіны праз мяжу з Сірыі і Лівана пачалі прарывацца на тэрыторыю Ізраіля тысячы арабаў (многія зь іх — палестынцы, што жывуць у гэтых краінах). Адбыліся сутычкі з арміяй, страляніна, загінулі 20 арабаў, шмат параненых. Прадстаўнік ізраільскай арміі заявіў, што ўсё гэта было манеўрам сірыйскага прэзыдэнта Асада, які спрабуе пераключыць увагу сусьветнага грамадзтва з народнага паўстаньня супраць ягонай улады ў Сірыі на іншыя праблемы. Сапраўды, на фота ў газэце сірыйскі дэманстрант трымае перад натоўпам адразу два партрэты Асада. Сірыйская армія не чыніла перашкодаў дэманстрантам на мяжы.

Наш камэнтар: Дыктатар Асад, які зьнішчае і эксплуатуе ўласны народ, раптам стаўся сымвалем вызваленьня палестынскага народу (?!). Цынічны ход антынароднай дыктатуры аплочаны жыцьцямі маладых людзей, якія пасунуліся за правакатарамі, што несьлі партрэты дыктатара.

Вельмі важная лекцыя: народ, ягоная моладзь, якія змагаюцца супраць тыраніі, не павінны паддавацца на правакацыйныя хады тырана. Нельга хадзіць у пасткі за папамі-гапонамі. Гэта зразумелі шмат якія беларусы 19 сьнежня летась, але гэтая лекцыя аплочана крывёй нашай моладзі.

16 траўня 2011 г. славацкая газэта “Pravda” апублікавала артыкул пад тытулам “Расейскі парлямант поўны мільянераў і беднякоў з багатымі жонкамі”. У артыкуле называюцца імёны мільянераў расейскага эканамічнага жыцьця паводле іхных дэпутацкіх справаздачаў перад Дзярждумай. Такую штогадовую справаздачу ўвёў быў прэзыдэнт Медведев. Знайшліся нават тры дэпутаты, вядомыя мільянеры, што паказалі ў дакумэнтах, як яны жывуць на свой парляманцкі заробак. Славацкая “Pravda” цытуе маскоўскую “Ізвестія”, якая пракамэнтавала маёмасныя прызнаньні дэпутатаў: “Дадзеных шмат, але інфармацыі мала”. Маскоўскія “Ведомості” напісалі: “Пытаньняў больш чым адказаў”.

Наш камэнтар: Зразумела, ніхто ў шчырасьць і паўнату гэтых прызнаньняў у Расеі не паверыў. Усім вядома, што Дзярждума РФ — карпаратыўны ворган улады крымінальнай групоўкі Крамля-Лубянкі.