РАСЕЙЦАМ УВАХОД ЗАБАРОНЕНЫ
14 чэрвеня дацкая газэта “Politiken” апублікавала артыкул пад тытулам “Таму што расейскія турысты надта крыклівыя і пыхлівыя”. Вось гэты артыкул:
61% дацкіх турыстаў ня хочуць жыць у гатэлі з расейцамі, як паказваюць дасьледваньні.
Тайскія трапічныя выспы, Індыйскі Гоа, эксклюзіўныя месцы для водных лыжаў ў Эгіпце, курорты ў Эгіпце, супэрмаркэты ў Дубаі.
Расейскія турысты ажыўляюць карціну ў зонах адпачынку па ўсім сьвеце. Толькі ў Тайландзе колькасьць расейскіх турыстаў вырасла на 201% з 2009 па 2011 г.
Але, на жаль, расейцы паводзяць сябе такім чынам, што ў турыстаў з іншых краінаў застаецца па іх нядобрая памяць.
Сытуацыя настолькі цяжкая, што рэстараны, напрыклад, у Тайландзе, ня хочуць дапускаць расейцаў. А падчас апошняга апытаньня, праведзенага дацкай агенцыяй Star Tour, 61% апытаных адказаў, што не хацеў бы бачыць расейцаў у сваім гатэлі.
“Адносіны непрыязныя. Яны не ўсьміхаюцца і рэдка зважаюць на іншых”, — кажа дырэктар па продажах агенцыі Star Tour Сьціг Элінг пра расейскіх турыстаў. Таму Star Tour імкнецца высьветліць колькасьць расейцаў, калі падпісвае кантракты з гатэлямі, каб расейцаў не было надта шмат, кажа Сьціг Элінг.
“Мы можам жыць з 30%. Іншы варыянт — гэта за шмат для нас і нашых кліентаў”, — паведаміў ён.
Пачуваюцца непаўнавартаснымі
Але такія гісторыі — гэта старая гарэлка ў старых пляшках. Расейцы гарланяць і напіваюцца, а іх прыязджае ўсё больш. Але чаму мы ўспрымаем расейцаў менавіта так?
Вібэкэ Спэрлінг, журналістка газэты “Politiken” і яе карэспандэнтка ва Усходняй Эўропе мае тлумачэньні гэтаму. Яна сама пабачыла расейцаў у дзеяньні ў Індыі, дзе яны ў асноўным занялі паўночную частку Гоа.
І гэта было “невыносна”
Паводле Вібэкэ Спэрлінг, зусім нямногія з расейскіх турыстаў паводзяць сябе спакойна і ціха. Астатнія напіваюцца ў дым і гарланяць, што зьвязана зь іхным раптоўным узбагачэньнем, часта дасягнутым нелегальным шляхам.
“Яны мяркуюць, што могуць паводзіць сябе так, бо прыехалі з супэрдзяржавы. Гэта пыха і ў той жа час пачуцьце непаўнавартаснасьці, бо Расею шмат крытыкуюць. Вось яны й зьбіраюцца ў вялікія групы і вэрбальна выяўляюць сябе з пуцінскай агрэсіўнасьцю”, — кажа Вібэкэ Спэрлінг, якая мяркуе, што расейцы й самы ведаюць, што яны ня надта папулярныя.
Сьціг Элінг спадзяецца і верыць, што гэта толькі пытаньне часу, калі расейцы змогуць стаць больш ураўнаважанымі турыстамі.
“Гэта адбываецца павольна. Цяпер дастаткова многія расейцы пабылі на вакацыях, што стала для іх нармальнай зьявай”, кажа дырэктар па продажах Star Tour і прывёў прыклад з датчанамі, якія ў 1960-70-я куражыліся па ўсёй Іспаніі.
Мала аптымізму ў Вібэкэ Спэрлінг. Таму што культурная зьмена патрабуе дэбатаў дома ў Расеі, каб вырашыць праблему.
“А ніякіх адкрытых дэбатаў па адмоўных баках Расеі ў расейскай прэсе няма”, — кажа Вібэкэ Спэрлінг.
Да таго ж яна мяркуе, што большы ціск з боку бюро падарожжаў на мясцовыя ўлады, напрыклад, у Тайландзе і Індыі, можа быць выйсьцем.
“Мяркую, што трэба паспрыяць таму, каб мясцовыя ўлады ўмяшаліся”.
Сунэ Хёйруп Бэнкэ
(Пераклаў з дацкай В. Буйвал)