ШАРЫЯТ ПА-ПАРЫЖСКУ
20 ліпеня славацкая газэта “SME” апублікавала артыкул пад тытулам “Пасьля штрафу за бурку ў прадмесьці Парыжа выбухнулі беспарадкі”. Вось гэты артыкул:
Мусульманскія дэманстранты напалі ў Трап таксама й на мясцовае аддзяленьне паліцыі, два паліцыянты былі паранены.
Трап. Да сутычак паміж мусульманскімі дэманстрантамі і паліцыяй дайшло на захад ад французкай мэтраполіі Парыжа падчас пратэстаў супраць забароны ісламскіх бурак, паінфармавала агенцыя АР.
Паліцыя ўжыла супраць дэманстрантаў, якія кідаліся каменьнем і распальвалі пажары, таксама й сьлезацечны газ. Былі паранены пяць чалавек і затрыманы шэсьць асобаў, як паведамілі ўлады.
Да беспарадкаў дайшло пасьля таго, як паліцыя ў Трап у заходнім прадмесьці Парыжа спыніла жанчыну, якая была цалкам захутана ў мусульманскай бурцы, напісала газэта “Le Parisien”.
Яе 21-гадовы муж меўся накінуцца на паліцыянтаў у спробе не дапусьціць, каб яны аштрафавалі жонку за заслонены твар. Мужчыну паліцыя ўрэшце арыштавала.
Сход з удзелам 200-400 асобаў перайшоў у гвалтоўныя акты ў пятніцу ўвечары прыблізна каля 20.30 гадзінаў, калі дэманстранты напалі на мясцовае аддзяленьне паліцыі. Былі паранены і два паліцыянты, паведаміла агенцыя DPA.
У Францыі дзейнічае забарона насіць буркі ў грамадзкіх месцах.
Petit Presse
Пераклаў з славацкай В. Буйвал.